I.
ປະຫວັດຄວາມເປັນມາຂອງສິລະປະລາວ.
ສິລະປະແມ່ນພາສາສັນສະກິດໝາຍເຖິງ
“ ຊ່າງ ” ຊ່າງສີມື
ຫຼື ສີມືຊ່າງພາສາບາລີວ່າ ສິບປະ ກໍ່ໝາຍເຖິງຊ່າງ ຫຼື ສີມືຊ່າງ; ສິລະປະ
ໃນຄວາມໝາຍອີກຢ່າງໝຶ່ງແມ່ນໝາຍເຖິງ ອຸບາຍ, ກົນອຸບາຍ, ເລກົນ, ສະຫຼາດ, ພິບໄຫວ... ເຖິງຢ່າງໃດກໍ່ຕາມ ສິລະປະ
ໃນຄວາມສໍານຶກໂດຍທົ່ວໄປຂອງຄົນລາວໝາຍເຖິງ ງາມ, ດີ, ສະຫຼາດ, ພິບໄຫວ... ຕົວຢ່າາງ:
ຊ່າງສີມື, ຊ່າງສີປາກ ຫຼື ສີມືຊ່າງ, ສີປາກຊ່າງ ທັງງາມ ທັງດີ ດັ່ງນີ້ເປັນຕົ້ນ.
ສິລະປະມີຄວາມໝາຍທີ່ກວ້າງຂວາງ ແລະ ເລິກເຊິ່ງ ເມື່ອຕໍ່ເຂົ້າກັບຄໍາສັບອື່ນ
ກໍ່ມີຄວາມໝາຍໄປຕາມເຄົ້າສັບນັ້ນໆ ເຊັ່ນ: ສິລະປະກໍາ ແມ່ນວຽກງານສິລະປະ,
ວຽກງານການຊ່າງ, ການຜະລິດທີ່ມີສີມືຊ່າງ. ສິລະປະກອນໝາຍເຖິງຄົນຜູ້ເຮັດວຽກສິລະປະ,
ນາຍຊ່າງ, ຊ່າງສິລະປະ ເປັນຕົ້ນ. ສິລະປະ
ມີຄວາມໝາຍກວ້າງຂວາງຕິດພັນກັບທຸກຂົງເຂດວຽກງານທັງທີ່ເປັນຮູບປະທໍາ ແລະ ນາມມະທໍາທີ່ມະນຸດຄົ້ນຄິດປະດິດສ້າງຂື້ນເພື່ອເສີມສ້າງຄວາມງາມຄວາມມ່ວນຄວາມພໍໃຈປະທັບໃຈດຶງດູດໃຈຕົວຢ່າງ:
ບົດລະຄອນ, ບົດຟ້ອນ, ບົດເພງ, ປູຊະນີຍະສະຖານ, ວັດວາອາຮາມ, ເຄື່ອງເອ້
ເຄື່ອງປະດັບຕ່າງໆ...ການປະດິດສ້າງສິລະປະ ຈະໄດ້ຄວາມດີປະທັບໃຈ
ດຶງດູດຈິດໃຈຄົນສໍ່າໃດນັ້ນກໍ່ຂື້ນຢູ່ກັບນາຍຊ່າງຜູ້ສະຫຼາດ ປັນຍາດີ
ມີຫົວຄິດປະດິດສ້າງຄ້າຍໆຄືກັນກັບວຽກງານອື່ນໆ ຊິງຕິດພັນກັບພື້ນຖານເສດຖະກິດ.
ການສຶກສາຂະຫຍາຍຕົວ ບ້ານເມືອງຢູ່ໃນຄວາມສະຫງົບສຸກວຽກງານສິລະປະກໍ່ຈະເລີນກ້າວໜ້າ ແລະ
ກົງກັນຂ້າມເມື່ອໃດປະເທດຊາດ ບ້ານເມືອງບໍ່ມີຄວາມສະຫງົບສຸກ ເສດຖະກິດ ແລະ
ການສຶກສາບໍ່ຂະຫຍາຍຕົວ ຂົງເຂດສິລະປະກໍ່ບໍ່ມີຄວາມຂະຫຍາຍຕົວເຊັ່ນດຽວກັນ.
ວັດຖຸສິລະປະຖ້າເບິ່ງທາງດ້ານຄຸນຄ່າກໍ່ມີຫຼາຍໆດ້ານແຕ່ອາດສັງລວມໄດ້ດັ່ງນີ້ຄື:
1.
ຄຸນຄ່າ
ທາງຄວາມງາມສາມາດສ້າງຄວາມປະທັບໃຈໃຫ້ແກ່ຜູ້ຄົນ ທີ່ໄດ້ພົບເຫັນ.
2.
ຄຸນຄ່າທາງດ້ານເຕັກນິກ
ຄວາມງາມ ແລະ ຫົວຄິດປະດິດສ້າງຄືຄົນທຳມະດາ (ບໍ່ແມ່ນຊ່າງ) ບໍ່ສາມາດເຮັດໄດ້.
3.
ຄຸນຄ່າທາງດ້ານອຸດົມການມີຄວາມໝາຍທາງດ້ານປັດຊະຍາທີ່ສ່ອງແສງເຖິງບັນຫາໃດໜຶ່ງ.
4.
ຄຸນຄ່າທາງດ້ານປະຫວັດສາດ
ສະແດງບອກເຫດການສັນຍາລັກຂອງໄລຍະປະຫວັດສາດ ສະໄໝໃດໜຶ່ງທີ່ແນ່ນອນ.
5.
ຄຸນຄ່າທາງວັດທະນາທໍາປະເພນີ
ສະແດງບອກເຖິງນິໄສໃຈຄໍຄວາມເຊື່ອຖືຮອດຄອງປະເພນີຂອງຄົນໃນຊາດ.
6.
ຄຸນຄ່າງທາງດ້ານວັດຖຸທີ່ເອົາມາປະດິດສ້າງ
ຕົວຢ່າງ: ເງິນ, ຄໍາ, ທອງ, ກົ່ວ, ໄມ້, ຫີນ, ດິນເຜົາ...
7.
ຄຸນຄ່າທາງເຊື້ອຊາດ
ຄືການສະແດງອອກໃຫ້ຮູ້ເຖິງເຊື້ອຊາດ ແລະ
ເຜົ່າຊົນໃດໜຶ່ງທີ່ເປັນເຈົ້າຂອງໆຜະລິດຕະພັນນັ້ນໆ.
ສະຖາປັດຕະຍະກໍາສິນ :
ແມ່ນວຽກງານການກໍ່ສ້າງທີ່ມີສີມືຊ່າງ ຫຼື ສິລະປະການກໍ່ສ້າງທີ່ໃຫ້ຄຸນຄ່າທາງດ້ານຄວາມງາມ,
ມີເທັກນິກວິທະຍາສາດ, ມີຄຸນລັກສະນະພາບຄົງທົນ ຮັບໃຊ້ສັງຄົມຕາມຍຸກຕາມສະໄໝ ຕົວຢ່າງ :
ບ້ານ, ເຮືອນ, ອາຄານ, ຜາສາດ, ຫໍໂຮງ, ອານຸສາວະລີ, ທາດເຈດີ...
ຈິດຕະກໍາສິນ :
ໝາຍເຖິງສິລະປະຮູບແຕ້ມດ້ວຍສີຕ່າງໆແຕ່ຄວາມຈິງແລ້ວໃນສະໄໝບູຮານຄໍາວ່າແຕ້ ຫຼື
ແຕ້ມລາຍນັ້ນທັງແຕ້ມດ້ວຍສີ, ຄວັດ ແລະ ແກະສະລັກ ຫຼື ຄໍາວ່າ ຈິດຕະກໍາສິນ
ກໍ່ແປວ່າວຽກງານສີມືທີ່ງາມ ແລະ ວິຈິດຕະກໍາສິນກໍ່ໝາຍເຖິງຊ່າງສີມືທີ່ງົດງາມ
ແຕ່ເຖິງຢ່າງໃດກໍ່ຕາມ ຄໍາວ່າຈິດຕະກໍາສິນໝາຍເຖິງຮູບແຕ້ມ ຕົວຢ່າງ :
ຝາຜາໜັງວັດສີສະເກດວຽງຈັນ, ວັດປ່າຮວກຫຼວງພະບາງ, ພິພິດທະພັນພະລາຊະວັງເກົ່າຫຼວງພະບາງ,
ຜ້າພະເຫວດ ແລະ ອື່ນໆ. ຢູ່ລາວເຮົາສິລະປະການແຕ້ມດວ້ຍສີ
ທີ່ເປັນຂອງບູຮານແທ້ໆນັ້ນເກືອບບໍ່ຍັງເຫຼືອເລີຍຍ້ອຍເສິກສົງຄາມຫຼາຍຄັ້ງຫຼາຍຄາວ ແລະ
ອີກສວ່ນໜຶ່ງກໍ່ແມ່ນເກີດຈາກການຄຸ້ມຄອງໃນໄລຍະທີ່ຜ່ານມາບໍ່ຄ່ອຍດີເທົ່າທີ່ຄວນ.
1. ສິລະປະລ້ານຊ້າງຫຼວງພະບາງຈະເລີນຮຸ່ງເຮືອງ
ທີ່ໃຫ້ຊື່ວ່າສິລະປະລ້ານຊ້າງຫຼວງພະບາງນີ້
ກໍ່ເພາະໝາຍເອົາໄລຍະທີ່ນະຄອນຫຼວງຂອງອານາຈັກລ້ານຊ້າງຕັ້ງຢູ່ດິນແດນຫຼວງພະບາງ
ນັບເອົາແຕ່ສະໄໝລາຊະການຂອງເຈົ້າຝ້າງຸ່ມ ມະຫາລາດ ປີ ຄ.ສ 1357
ເຖິງເຄິ່ງກາງສະໄໝການປົກຄອງຂອງພະເຈົ້າໄຊຍະເຊດຖາທິລາດ ປີ ຄ.ສ 1560.
ອີງຕາມໄລຍະປະຫວັດສາດ, ລັກສະນະ ແລະ
ຈຸດພິເສດຂອງສິລະປະ ທີ່ພົບເຫັນຢູ່ດິນລາວລ້ານຊ້າງ ສະໄໝນະຄອນຫຼວງຕັ້ງຢູ່ຫຼວງພະບາງ
ນັ້ນອາດຈັດໄດ້ເປັນສະກຸນຊ່າງດັ່ງນີ້ :
-
ສະກຸນຊ່າງ
ຊຽງແສນ
-
ສະກຸນຊ່າງ
ວຽງຄໍາ
-
ສະກຸນຊ່າງ
ວັດມະໂນລົມ
-
ສະກຸນຊ່າງ
ວັດວິຊຸນ
-
ສະກຸນຊ່າງ
ວັດຊຽງທອງ
ສະກຸນຊ່າງສິລະປະ
ຊຽງແສນ.
ທີ່ເອີ້ນວ່າສະກຸນຊ່າງຊຽງແສນກໍ່ເພາະວ່ານັກບູຮານຄະດີໄດ້ພົບເຫັນສະກຸນຊ່າງສິລະປະ
ທີ່ມີຈຸກພິເສດໂດຍສະເພາະທີ່ເມືອງຊຽງແສນຈຶ່ງໄດ້ຊື່ວ່າ ສະກຸນຊ່າງສິລະປະຊຽງແສນ
ເມືອງຊຽງແສນຕັ້ງຢູ່ທາງພາກເໜືອຂອງປະເທດໄທເຄືອເປັນເມືອງຫຼວງຂອງອານາຈັກລ້ານນາສະໄໝກ່ອນຊຽງໃໝ່
ແລະ ເຄີຍມີສາຍພົວພັນອັນດີກັບອານາຈັກລາວລ້ານຊ້າງຕັ້ງແຕ່ສະໄໝເຈົ້າພະຍາຟ້າງຸ່ມ
ມະຫາລາດເຖິງສະໄໝເຈົ້າໄຊຍະເສດຖາທິລາດ ສະຕະວັດທີ 16. ສິລະປະຊຽງແສນ
ທີ່ປະກົດໃຫ້ເຮົາເຫັນຢູ່ປະຈຸບັນນີ້ສ່ວນຫຼາຍແມ່ນສິລະປະທາງພຸດທະສາສະໜາມີຊາກບູຮານສະຖານ
ໂບດວິຫານ ສວ່ນຫຼາຍໄດ້ບຸລະນະຂື້ນໄໝ່ທັງໝົດ ແລ້ວອັນພິເສດກວ່າໜູ່ແມ່ນສິລະປະພະພຸດທະຮູບ
ເຮັດດ້ວຍທາອງສໍາລິດ, ທອງເຫຼືອງ, ນາກ, ເງິນ, ຄໍາ ແບບຊົງຕ່າງໆທີ່ງົດງາມເປັນພິເສດ ແລະ
ມີຫຼາຍຢູ່ນະຄອນຫຼວງພະບາງ.
ສະກຸນຊ່າງສິລະປະ
ວຽງຄໍາ.
ໃນໄລຍະທີ່ສະກຸນຊ່າງສິລະປະຊຽງແສນຂະຫຍາຍຕົວຢູ່ທາງພາກເໜືອນັ້ນ
ສະກຸນຊ່າງສິລະປະວຽງຄໍາ ກໍ່ຂະຫຍາຍຕົວຢູ່ທາງພາກກາງ ແລະ ພາກໃຕ້ຂອງອານາຈັກລ້ານຊ້າງ.
ເມືອງວຽງຄໍາຕັ້ງຢູ່ບໍລິເວນທົ່ງຮາບສອງຝັ່ງລ່ອງື່ມຂອງແຂວງວຽງຈັນ ໃນເຂດເມືອງທຸລະຄົມ,
ແກ້ວອຸດົມ ແລະ ໂພນໂຮງປະຈຸບັນ. ສະກຸນຊ່າງສິລະປະວຽງຄໍາ ເທົ່າທີ່ມີຫຼັກຖານໃຫ້ເຫັນໄດ້ກໍ່ມີສະຖາປັດຕະຍາກໍາ
ແລະ ປະຕິມາກໍາ ໂດຍສະເພາະປະຕິມະກໍາພະພຸດທະຮູບເທົ່າທີ່ຄົ້ນພົບນັ້ນມີຢູ່ສາມຮຸ່ນຄື:
ຮຸ່ນທໍາອິດ ແມ່ນສິລະປະມອນ
ຊຶ່ງມີເຄົ້າຢູ່ອິນເດຍສະໄໝຄຸບຕະໄດ້ເຂົ້າມາມີບົດບາດຢູ່ອານາຈັກລ້ານຊ້າງພາກກາງ ແລະ
ພາກໃຕ້ແຂວງວຽງຈັນ, ບໍລິຄໍາໄຊ ແລະ ຄໍາມ່ວນແຕ່ປະມານສະຕະວັດທີ 6-7 ແຫ່ງຄິດຕະສັງກາດ
(ສິລະປະດຽວກັນກັບສິລະປະສະໄໝ ທະວາລະວະດີທີ່ຮາບລຸ່ມແມ່ນໍ້າເຈົ້າພະຍາ) ຮຸ່ນທີສອງເປັນຮູບແບບສິລະປະສະໄໝມອນ
ຂມ ຫຼື ມອນ-ຂະແມ ໄດ້ເລີ່ມຂືນແຜ່ຫຼາຍທີ່ທົ່ງຮາບວຽງຈັນ ເມື່ອປະມານສະຕະວັດທີ 11
ແຫ່ງຄິດຕະສັງກາດ, ຮຸ່ນທີສາມບັນດາສິລະປະຕ່າງຕ່າງໆ
ໄດ້ຖືກພັດທະນາຂື້ນເປັນສິລະປະລາວລ້ານຊ້າງ ເລີ່ມຕັ້ງແຈ່ສະຕະວັດທີ 14 ເຖິງສະຕະວັດທີ
16 ຈາກນັ້ນປາກົດວ່າອໍານາດວຽງຄໍາໄດ້ຫຼຸດຜ່ອນລົງກວ່າວຽງຈັນ.
ສະກຸນຊ່າງສິລະປະພະພຸດທະຮູບສ່ວນຫຼາຍ ແມ່ນປາງຫ້າມຍາດ, ປາງສະມາທິ ແລະ ປາຊະນະມານ.
ສະກຸນຊ່າງສິລະປະ ວັດມະໂນລົມ.
ສະກຸນຊ່າງສິລະປະສະກຸນຊ່າງວັດມະໂນລົມຫຼວງພະບາງ
ໄດ້ມີບົດບາດເລີ່ມຕັ້ງແຕ່ປະມານຕົ້ນສະຕະວັດທີ 15 ແຫ່ງຄິດຕະສັງກາດ ຕາມພົງສາວະດານມະຫາສິລາ
ວິລະວົງກ່າວວ່າ ວັດມະໂນລົມສ້າງເມື່ອ ຄ.ສ 1428 ກວມເອົາອັດຖິທາດຂອງພະຍາລ້ານຄໍາແດງ
ແຕ່ສະກຸນຊ່າງສິລະປະໄດ້ຂະຫຍາຍຕົວມາກ່ອນແລ້ວໄດ້ມີບົດບາດຫຼາຍເມື່ອງເຄິ່ງທ້າຍສະຕະວັດທີ
15.
ສະກຸນຊ່າງສິລະປະວັດມະໂນລົມ
ເດັ່ນທີ່ສຸດເຊິ່ງເຮົາຍັງໄດ້ເຫັນເຫັນໄດ້ຊົມນັ້ນແມ່ນໄດ້ແກ່ປະຕິມະກໍາສິນ
ພະພຸດທະຮູບດ້ວຍທາອງສໍາລິດ, ທອງເຫຼືອງ, ຄໍາ. ພະພຸດທະຮູບສະກຸນຊ່າງນີ້
ເທົ່າທີ່ຄົ້ນພົບແມ່ນມີຢູ່ 2 ລຸ່ນຄື: ລຸ່ນທໍາອິດແທ່ນຕໍ່າຖ້ານດຽວ
ປະດັບດ້ວຍລາຍກີບດອກບົວຂວໍ້າບົວຫງາຍ, ແອວນ້ອຍ, ເອິກໃຫ່ຍ, ໄລ່ໃຫ່ຍ, ໜ້າໂສກ,
ນັ່ງເທີ້ງເບິ່ງໄກ, ດັງຄົມ, ຍອດເກດເປັນຮູບດອກບົວຈູມສ່ວນຫຼາຍ,
ເສາເປັນຕຸ່ມຂອດກົ້ນຫອຍ, ນີ້ວມືແບບທໍາມະຊາດ
ບໍ່ພຽງສະເໝີກັນເໝືອນພະພຸດທະຮູບສະໄໝອື່ນໆ. ລຸ່ນທີສອງໄດ້ມີການພັດທະນາໄປເລັກໜ້ອຍຄື:
ສ່ວນຫຼາຍແທ່ນຕໍ່າ ແຕ່ບໍ່ນິຍົມປະດັບດ້ວຍກີບດອກບົວສະເໝີໄປ ຍອດເກດເປັນຮູບດອກບົວຈູມ
ກໍ່ມີຮູບແປວໄຟກໍ່ມີ, ເກສາເປັນຕຸ່ມແຫຼມເໝືອນໜາມໝາກມີ້.
ສະກຸນຊ່າງສິລະປະ ວັດວິຊຸນ
ສະກຸນຊ່າງສິລະປະວັດວິຊຸນຫຼວງພະບາງ
ໄດ້ເລີ່ມຂື້ນມີບົດບາດໄຂສັງກາດໃໝ່ທາງດ້ານສິລະປະ ແຕ່ເບື້ອງຕົ້ນສະຕະວັດທີ 16
ແຫ່ງຄິດຕະສັງກາດ ສະແດງອອກໃຫ້ເຫັນທາງຮູບຮ່າງ ແລະ
ລັກສະນະຂອງສິລະປະຕ່າງໆຈາກສະກຸນຊ່າງສິລະປະວັດມະໂນລົມ. ສະຖາປັດຕະຍາກໍາສິນ
ມີເຈດີພະປະທຸມ ຫຼື ພະທາດໝາກໂມ, ພຸທະສິມາ ແລະ ຊຸມປະຕູໃຫ່ຍທາງເຂົ້າວັດເບື້ອງອາລາມປະຈຸບັນໄດ້ເປັນຫຼັກຖານສະແດງອອກເຖິງຄວາມງາມອີກແບບໜຶ່ງ.
ສະກຸນຊ່າງສິລະປະນີ້
ໄດ້ພັດທະນາຂື້ນສະໄໝລາຊະການພະເຈົ້າວິຊຸນະລາດ ໂພທິສາລາດ (1500-1550) ໃນໄລຍະນີ້ສິລະປະວັດທະນາທໍາລາວລ້ານຊ້າງໄດ້ມີຄວາມຈະເລີນກ້າວໜ້າຫຼາຍ.
ສະກຸນຊ່າງສິລະປະ ວັດຊຽງທອງ.
ສະກຸນຊ່າງສິລະປະວັດຊຽງທອງ
ເລີ່ມຂື້ນເມື່ອກາງສະຕະວັດທີ 16 ແຫ່ງຄິດຕະສັງກາດ (1550-1570) ແລະ
ໄດ້ເປັນຕົ້ນເຄົ້າສະກຸນຊ່າງສິລະປະວຽງຈັນ ສະໄໝລາຊະການຂອງພະເຈົ້າໄຊຍະເສດຖາທິລາດ (
ສະກຸນຊ່າງສິລະປະທາດຫຼວງ, ວັດອົງຕື້, ວັດອິນແປງ, ວັດສີເມືອງ, ຫໍພະແກ້ວ... ).
ສະກຸນຊ່າງສິລະປະວັດຊຽງທອງນີ້
ໄດ້ພັດທະນາເປັນແບບສິລະປະລາວລ້ານຊ້າງລ້ວນໆ ຊຶ່ງບໍ່ເໝືອນກັບສິລະປະສະກຸນຊ່າງໃດໆມາກ່ອນ
ໄດ້ເລີ່ມຂື້ນທີ່ວັດຊຽງທອງຫຼວງພະບາງ ເມື່ອກາງສະຕະວັດທີ 16 ແຫ່ງຄິດຕະສັງກາດພິເສດຂອງສະກຸນຊ່າງນີ້ຢູ່ບ່ອນວ່າ
ການປະດິດສ້າງທີ່ສະແດງອອກເຖິງນິໄສໃຈຄໍ ຂອງຄົນລາວລ້ວນ ທັງລະອຽດອ່ອນ ແລະ
ງາມແບບທໍາມະຊາດແທ້ໆ ເຊິ່ງພັດທະນາມາຈາກຫຼາຍໆສະກຸນຊ່າງສິລະປະ.
2. ສິລະປະລ້ານຊ້າງວຽງຈັນ ຈະເລີນຮຸ່ງເຮືອງ
ສິລະປະສະໄໝລ້ານຊ້າງວຽງຈັນນີ້
ອາດຈັດໄດ້ເປັນ 2 ສະກຸນຊ່າງທີ່ດີເດັ່ນແຕກຕ່າງກັນ ແລະ ໃນໄລຍະຕ່າງກັນຄື :
1.
ສະກຸນຊ່າງສິລະປະສະໄໝພະເຈົ້າໄຊຍະເສດຖາທິລາດ.
2.
ສະກຸນຊ່າງສິລະປະສະໄໝພະເຈົ້າສຸລິຍະວົງສາ
ທໍາມິກະລາດ
ສະກຸນຊ່າງສິລະປະສະໄໝພະເຈົ້າໄຊຍະເສດຖາທິລາດ
ໄດ້ມີການພັດທະນາໃຫ້ເປັນຮູບແບບຂອງຕົວເອງ.
ເຖິງແມ່ນມີຕົ້ນເຄົ້າມາຈາກສະກຸນຊ່າງຫຼາຍໆບ່ອນກໍ່ດັດແປງໃຫ້ເຂົ້າກັບນິໄສໃຈຄໍຂອງຄົນລາວເຜົ່າຕ່າງໆ
ຄວາມງາມຄວາມປານີດຂອງສິລະປະກໍມີຈຸດພິເສດຂອງຕົວເອງ ໂດຍສະເພາະສິລະປະທາງສາສະໜາ
ຊຶ່ງມີກົກເຄົ້າມາຈາກບ່ອນອື່ນ ແລະ ໃນໄລຍະດຽວກັນສິລະປະຂອງຄົນລາວ ເຜົ່າຕ່າງໆ
ກໍມີການຂະຫຍາຍຕົວໄປພ້ອມໆກັນກັບຂະບວນວິວັດສິລະປະທາງສາສະໜາ.
ສະກຸນຊ່າງສິລະປະສະໄໝພະໄຊຍະເສດຖາທິລາດ
ທີ່ຍັງເຫຼືອໃຫ້ເຫັນຢູ່ໃນປະຈຸບັນນີ້ສ່ວນຫຼາຍແມ່ນວັດຖຸສິລະປະທາງສາສະໜາ
ເພາະວ່າສິ່ງກໍ່ສ້າງທາງສາສະໜານັ້ນ ແມ່ນວັດຖຸຄົງທົນດີ
ເຊັ່ນວ່າ: ຫີນ, ດິນຈີ່, ໄມ້ເນື້ອດີ...., ພະທາດຫຼວງ,
ຫໍພະແກ້ວ, ວັດອົງຕື້, ວັດອິນແປງ, ວັດສີເມືອງ, ພະທາດສີໂຄດ, ຍອດທາດອີງຮັງ,
ຍອດທາດພະນົມ...ປະຕິມະກໍາສິນ ພະພຸທະຮູບ, ຮູບຄວັດແກະສະຫຼັກໃສ່ແທ່ນພະພຸດທະຮູບ, ດາບ,
ໂອ, ຂັນ ແລະ ອື່ນໆ.
ສະກຸນຊ່າງສິລະປະສະໄໝພະເຈົ້າໄຊຍະເຊດຖາທິລາດ
ໄດ້ສືບຕໍ່ຂະຫຍາຍຕົວເຖິງຕົ້ນສະຕະວັດທີ 17 ແຫ່ງຄິດຕະສັງກາດ
ເຖິງວ່າການປົກຄອງຕົກຢູ່ໃນອໍານາດຂອງພະມ້າໄລຍະໜຶ່ງ ແຕ່ສິລະປະວັດທະນາທໍາກໍ່ບໍ່ໄດ້ປ່ຽນແປ.
ສະກຸນຊ່າງສິລະປະສະໄໝພະເຈົ້າສຸລິຍະວົງສາ
ທໍາມິກະລາດ ໄດ້ກໍາເນີດຂື້ນລະຫວ່າງປີ ຄ.ສ
1638-1695 ສະກຸນຊ່າງສິລະປະນີ້ໄດ້ພັດທະນາຈາກສະກຸນຊ່າງສິລະປະສະໄໝພະໄຊຍະເຊດຖາທິລາດ
ຊຶ່ງຊຶ່ງມີລັກສະນະຄວາມງາມອີກແບບໜຶ່ງ. ຜົນງານຂອງສະກຸນຊ່າງນີ້
ໄດ້ມີຫຼາຍທົ່ວໆໄປພິເສດຢູ່ວຽງຈັນ ແລະ ເມືອງພວນຊຽງຂວາງເຊັ່ນ: ພະທາດຝຸ່ນ, ວັດສີພົມ
ເມືອງຄູນ ແລະ ປະຕິມາກໍາ ພະພຸທະຮູບທອງ ແລະ ອື່ນໆ ລ້ວນແຕ່ມີສີມືຊ່າງສະໄໝພະເຈົ້າສຸລິຍະວົງສາທໍາມິກະລາດ
ສະຕະວັດທີ 17 ແຫ່ງຄິດຕະສັງກາດ.
3. ສິລະປະລາວສະໄໝ 3 ອານາຈັກ
ສິລະປະລາວສະໄໝແຕກແຍກກັນເປັນ
3 ອານາຈັກ: ລ້ານຊ້າງວຽງຈັນ, ລ້ານຊ້າງຫຼວງພະບາງ ແລະ ນະຄອນຈໍາປາສັກ
ໄດ້ມີການພັດທະນາໄປແຕກຕ່າງກັນບໍ່ວ່າຈະເປັນຄວາມງາມ ຄວາມປານີດກໍ່ແຕກຕ່າງກັນ.
ສິລະປະນີ້ອາດຈັດໄດ້ເປັນ 2 ໄລຍະປະຫວັດສາດແຕກຕ່າງກັນຄື: ໄລຍະທີ່ອານາຈັກລາວລ້ານຊ້າງ
ແຕກແຍກກັນອອກເປັນ 3 ອານາຈັກ ແລະ
ໄລຍະທີ່ຕົກເປັນຫົວເມືອງຂື້ນຂອງສະຫຍາມໃນສອງໄລຍະນີ້ອາດຈັດໄດ້ເປັນກຸ່ມຊ່າງສິລະປະໄດ້ດັ່ງນີ້:
1.
ສະກຸນຊ່າງສິລະປະວຽງຈັນ.
2.
ສະກຸນຊ່າງສິລະປະຫຼວງພະບາງ
3.
ສະກຸນຊ່າງສິລະປະຈໍາປາສັກ.
4.
ສະກຸນຊ່າງສິລະປະສະຫຍາມທີ່ມີຢູ່ລາວ.
ສະກຸນຊ່າງສິລະປະ
ວຽງຈັນ.
ວຽງຈັນເລີ່ມແຕ່ສະໄໝປົກຄອງຂອງເຈົ້າໄຊຍະອົງເຫວ້ ຫຼື
ໂຄ້ງພະໄຊຍະເຊດຖາທິລາດ II
ເຖິງສະໄໝຂອງເຈົ້າອົງບູນ ຫຼື ເຈົ້າສິລິບຸນຍະສານ ( ຄ.ສ 1698-1778 )
ຊຶ່ງເປັນໄລຍະທີ່ລ້ານຊ້າງວຽງຈັນຂະຫຍາຍຕົວໄປໂດຍສະເພາະທາງດ້ານສິລະປະວັດທະນາທໍາ.
ວຽກງານການແຕ້ມຄວັດ, ແກະສະຫຼັກ, ປັ້ນຫຼໍ່ ໄດ້ພັດທະນາຈາກສະກຸນຊ່າງສິລະປະສະໄໝພະເຈົ້າສຸລິຍະວົງສາ
ທໍາມິກະລາດໄດ້ປະດິດສ້າງດ້ວຍຊ່າງສີມືທີ່ດີເດັ່ນມີຄວາມງາມປະນີດກວ່າບ່ອນໃດໝົດໃນເວລານັ້ນ.
ສະກຸນຊ່າງສິລະປະນີ້ໄດ້ຂະຫຍາຍຕົວຫຼາຍຢູ່ວຽງຈັນ ແລະ ຊຽງຂວາງ ແຕ່ປະຕິມາກໍາສິນ
ພະພຸທະຮູບລ້ານຊ້າງວຽງຈັນ ສະຕະວັດທີ 18 ສ່ວນຫຼາຍດັງໃຫ່ຍ ຄືດັງແຂກອິນເດຍ.
ສະກຸນຊ່າງສິລະປະ
ຫຼວງພະບາງ.
ສະກຸນຊ່າງສິລະປະຫຼວງພະບາງ ນັບແຕ່ການປົກຄອງຂອງເຈົ້າກິດສະລາດ
ຄ.ສ 1707 ເຖິງສະໄໝຂອງເຈົ້າສຸລິຍະກຸມມານ ຄ.ສ 1778
ສິລະປະໃນໄລຍະນີ້ເທົ່າທີ່ຄົ້ນຄ້ວາພົບຢູ່ຫຼວງພະບາງສ່ວນຫຼາຍບໍ່ປານີເທົ່າທີ່ຄວນ
ຖ້າສົມທຽບໃສ່ສະກຸນຊ່າງວຽງຈັນ ຫຼື ສົມທຽບໃສ່ຍຸກສະໄໝອານາຈັກລາວລ້ານຊ້າງຫຼວງພະບາງຈະເລີນຮຸ່ງເຮືອງ
ແຕ່ສັງເກດເຫັນວ່າເປັນສີມືຂອງຄົນລາວໂດຍແທ້.
ອາດເປັນໄປໄດ້ວ່າໃນໄລຍະນີ້ສີມືດີເດັ່ນຂອງລາວສ່ວນຫຼາຍໄດ້ລົງມາລວມສູນຢູ່ວຽງຈັນ
ຈຶ່ງສັງເກດເຫັນວັດຖຸສິລະປະສະກຸນຊ່າງວຽງຈັນ ແລະ
ຫຼວງພະບາງຊຶ່ງເຮັດໃນໄລຍະດຽວກັນມີຄວາມປານີດຫຼຸດລື່ນກັນຫຼາຍ.
ສະກຸນຊ່າງສິລະປະ
ນະຄອນຈໍາປາສັກ.
ສະກຸນຊ່າງສິລະປະນະຄອນຈໍາປາສັກ
ນັບແຕ່ສະໄໝການປົກຄອງຂອງເຈົ້າສ້ອຍສີສະໝຸດພຸດທາງກູນ ຄ.ສ 1714
ເຖິງສະໄໝຂອງເຈົ້າໄຊຍະກຸມມານ ຄ.ສ 1778 ສະກຸນຊ່າງສິລະປະໃນໄລຍະນີ້ສາມາດເອີ້ນໄດ້ວ່າ
ສະກຸນຊ່າງສິລະປະຄູຂີ້ຫອມ ຊຶ່ງພັດທະນາໄປຈາກສະກຸນຊ່າງສະໄໝພະເຈົ້າສຸລິຍະວົງສາ
ທໍາມິກະລາດ ສະກຸນຊ່າງນີ້ແພ່ຫຼາຍຢູ່ເຂດດອນໂຂງ, ດອນໄຊ, ດອນແດງ, ດອນຈໍາປາສັກ
ແຂວງຈໍາປາສັກ ແລະ ບາງບ່ອນທາງພາກອີສານຂອງໄທ.
ສີມືຊ່າງພະຄູຂີ້ຫອມທີ່ດີເດັ່ນ
ແລະ ບາງອັນຍັງມີຢູ່ປະຈຸບັນນີ້ຄື: ລະຄັງໃຫ່ຍເຮັດດ້ວຍທອງ, ພະເຈດີພະຄູຂີ້ຫອມວັດກາງໂຂງ
ເມືອງໂຂງ ແຂວງຈໍາປາສັກພະທາດຄູຂີ້ຫອມທີ່ວັດທາດ
ສາເມືອງຈໍາປາສັກ, ພະພຸທະຮູບທອງສອງອົງ (
ປະຊາດອນແດງແຂວງຈໍາປາສັກ ແລະ ອື່ນໆ. ສວ່ນສິລະປະຕົກແຕ່ງຄວັດ ແລະ
ແກະສະຫຼັກທີ່ປະສົມກັນໄປລະຫວ່າງສິລະປະສະກຸນຊ່າງສະໄໝພະເຈົ້າສຸລິຍະວົງສາ ທໍາມິກະລາດ
ກັບສິລະປະຂອມທີ່ມີມາແຕ່ກ່ອນແລ້ວ.
ສະກຸນຊ່າງສິລະປະ ນະຄອນຈໍາປາສັກ.
ສະກຸນຊ່າງສິລະປະນີ້
ຖືເອົາໄລຍະທີ່ລາວລ້ານຊ້າງທັງ 3 ອານາຈັກຕົກເປັນປະເທດສະ
ລາດຂອງສະຫຍາມ ( ຄ.ສ 1778-1893 ) ແລະ
ສະກຸນຊ່າງສິລະປະນີ້ໄດ້ປະກົດເຂົ້າມາມີບົດບາດຢູ່ດິນແດນລາວລ້ານຊ້າງ
ເລີ່ມແຕ່ຕົ້ນສະຕະວັດທີ 19 ແຫ່ງຄິດຕະສັງກາດໂດຍສະເພາະຢູ່ຫຼວງພະບາງ, ວຽງຈັນ ແລະ
ຈໍາປາສັກບາງຕົວຢ່າງຄື : ວັດປ່າຮວກ, ວັດປ່າແກ, ວັດອາຮາມ, ວັດດອນໂມ... ຫຼວງພະບາງ,
ວັດສີສະເກດ ວຽງຈັນ, ບາງວັດຢູ່ເຂດດອນໂຂງ, ດອນໄຊ, ດອນແດງ, ເມືອງຈໍາປາສັກ
ແຂວງຈໍາປາສັກ. ວັດຕ່າງໆທີ່ກ່ວມານີ້ ໄດ້ພົບເຫັນຮ່ອງຮອຍສິລະປະວັດທະນາທໍາສະຫຍາມສັບປົນຢູ່
ສິລະປະສະຫຍາມສ່ວນຫຼາຍແມ່ນປະຫຍຸກມາຈາກສິລະປະຂອມອີກເທື່ອໜຶ່ງ.
ສິລະປະວັດທະນາທໍາສະຫຍາມນີ້
ຖືກຈໍາກັດຢູ່ແຕ່ເຂດເມືອງໃຫ່ຍທີ່ຕັ້ງຢູ່ຕາມລໍາແມ່ນໍາຂອງທໍ່ນັ້ນ ແລະ
ໃນທາງກົງກັນຂ້າມສິລະປະລາວລ້ານຊ້າງໄດ້ກັບໄປຈະເລີນຮຸ່ງເຮືອງຢູ່ດິນແດນສະຫຍາມ ໂດຍສະເພາະໃນສະໄໝທີ່ລາວລ້ານຊ້າງຖືກກວາດຕ້ອນໄປຢູ່ດິນແດນສະຫຍາມ
ແລະ ໃນໄລຍະດຽວກັນ ມໍລະດົກວັດທະນາທໍາລາວລ້ານຊ້າງຢູ່ດິນແດນລາວສ່ວນຫຼາຍກໍ່ຖືກດັບສູນ
ທີ່ຍັງກໍ່ເປັນອໍາມະພາດ.
ເອກສານອ້າງອີງ: ປື້ມປະຫວັດສິລະປະລາວ
No comments:
Post a Comment